न्यू बुरहानी इंग्लिश मीडियम स्कूलमध्ये दिनांक १५ ऑगस्ट २०२६ रोजी ८० वा स्वातंत्र्यदिन मोठ्या उत्साहात, देशभक्तीमय वातावरणात आणि विविध सांस्कृतिक कार्यक्रमांनी उत्साहपूर्ण वातावरणात साजरा करण्यात आला.
कार्यक्रमासाठी प्रमुख पाहुणे म्हणून शाळेचे चेअरमन श्री. मुस्तफाभाई भडगाववाला सर, संस्थेचे सदस्य श्री. जुझरभाई कपासी सर, तसेच श्री. मोहम्मदभाई भडगाववाला सर, शाळेचे प्राचार्य श्री. डी. पी. देवरे सर आणि सुपरवायझर सौ. एस. यू. जगताप मॅडम यांची प्रमुख उपस्थिती लाभली.
स्वातंत्र्यदिनानिमित्त विद्यार्थ्यांसाठी विविध सांस्कृतिक आणि शैक्षणिक कार्यक्रमांचे आयोजन करण्यात आले होते. कार्यक्रमाची विशेष सुरुवात देशभक्तीपर गीतांवर आधारित कवायतीने झाली. विद्यार्थ्यांनी शिस्तबद्ध पद्धतीने सादर केलेल्या कवायतीने उपस्थितांची मने जिंकली. त्यानंतर काही वर्गातील विद्यार्थिनींनी देशभक्तीपर गीतांवर सुंदर नृत्याविष्कार सादर करून कार्यक्रमाची शोभा वाढवली.
स्वातंत्र्यदिनाचे महत्त्व विद्यार्थ्यांना समजावे आणि त्यांच्यामध्ये देशप्रेम, राष्ट्रनिष्ठा व जबाबदार नागरिकत्वाची भावना निर्माण व्हावी, या उद्देशाने इयत्ता पहिली ते सहावीच्या विद्यार्थ्यांनी स्वातंत्र्यदिनानिमित्त आपले मनोगत व्यक्त केले. विद्यार्थ्यांनी स्वातंत्र्यसैनिकांचे योगदान, देशाची प्रगती आणि नागरिक म्हणून आपली कर्तव्ये याविषयी विचार मांडले. कार्यक्रमादरम्यान विविध परीक्षांमध्ये आणि क्रीडा क्षेत्रात उल्लेखनीय कामगिरी करणाऱ्या विद्यार्थ्यांचा मान्यवरांच्या हस्ते गौरव करण्यात आला. इंडियन टॅलेंट ओलंपियाड परीक्षेतील विजेत्या विद्यार्थ्यांना मेडल देऊन सन्मानित करण्यात आले. तसेच स्कॉलरशिप परीक्षेच्या मेरिट लिस्टमध्ये स्थान मिळविणाऱ्या विद्यार्थ्यांचा विशेष सत्कार करण्यात आला. रंगोत्सव चित्रकला परीक्षेतील विजेत्या विद्यार्थ्यांना ट्रॉफी आणि आकर्षक भेटवस्तू देऊन त्यांच्या कलागुणांचे कौतुक करण्यात आले.
